Dis be di first time since January 2025 wey di ex-minister dey appear for public afta e comot Ghana to di US for “medical attention.”

Di ex-Ghana minster appear for di Caroline detention centre as e dey wear one grey jacket, wey he wear black detention coverall.

He also dey wear blue face mask – di common one wey pipo wear during di covid 19 pandemic.

As e waka enter di isolated room, e comot di jacket, leaving im dark detention outfit.

E carry di jacket hang for chair behind a table for di centre of di empty room, wey e sidon.

Di minister also wear one armband for his wrist.

Few minutes later, Ken Ofori-Atta comot di chair wey e comot di lonely detention room briefly, bifor e return when di judge call im case.

As e return, e move im glasses wey e hang am on top his head wey e sidon for di chair dey face di camera.

As di judge call di case, lawyers for di minister, Christopher Chaisson and Kwao Amagashie tok say dem wan make di judge hear di case for private.

Judge David Gardey: Dis be di bond determination hearing for di mata wey involve Kenneth Ofori-Atta. Dem detain am for di Caroline detention centre wey he dey appear by Webex (virtual conference). Make di lawyers wey dey represent am enta dia appearance.

Lawyers: I be Christopher Chaisson, I dey on behalf of Enayat Qasimi and Kwao Amagashie on behalf of di respondent.

Judge David Gardey: Sake of di nature of di issues wey we discuss for di bond hearing, you pipo want di bond hearing to be private, as in make e dey closed to di public?

Christopher Chaisson: Yes, your honour. I make happy say you raise dis mata serf. I wan raise am bifor.

Judge David Gardey: Okay. I hear am.

Christopher Chaisson: For di record, your honour. Di oda issue also dey – di master calendar hearing. Wit di way di mata dey, some of di issues we go raise for di hearing be sensitive.

Judge David Gardey: You dey ask say di master calendar hearing also go dey private; closed to di public?

Christopher Chaisson: Yes. We wan clarify sometin small. We go like say make di two hearings all dey closed to di public.

However, for di bond hearing case, we go ask di court say make dem try anytin dem fit do for dia power, to finish di case [today]. I go wait for di court decision.

Judge David Gardey: I understand. So all di pipo wey join us for di Webex (online video conference), we go hear di mata in private under di US immigration law. Di law say if any party for di immigration case say make di hearing dey private and closed to di public, under di circumstances, di court go close di hearing.

If anyone dey for di Webex (online video platform) wey dey here to view dis hearing; either di bond hearing or di master calendar hearing, make everyone comot now sake of we neva go continue if pipo still dey on di online link. Only di parties for di case dey allowed to be present during di hearing.

Dat be how dem comot hundreds of Ghanaians wey join di virtual link to follow di proceedings for di hearing to continue.

Afta dem arrest Ken Ofori-Atta for di US, his Ghana lawyers tok say “Oga Ofori-Atta get pending petition for adjustment of status wey go allow pesin to stay for di US legally past di period of validity of dia visa,” di statement by Justice Kusi-Minkah Premo explain.

“Oga Ken Ofori-Atta be law-abiding pesin wey he dey fully cooperate wit ICE to deal wit dis mata,” di statement from his lawyers add.

Now as di Annadale immigration court judge adjourn di case to 27 April, di ex-finance minister go likely remain in detention until di next hearing (for three months).

Sabi pipo explain say if di ex-minister lawyers succeed wit di bond application, den dia client go dey out of di ICE custody wey he go dey attend di substantive immigration hearing.

If dem no succeed or di judge no gree wit dia argument, di detainee go dey inside ICE custody until dia deportation case dey finalized.

Di judge gat di discretion to determine weda pesin be flight risk or di pesin be danger for di community

If pesin dey inside custody during di hearing, di case go fit move fast fast.

For all dis, di detainee get option to appeal if di judge deny dem di bond.

Dem fit appeal to di board of immigration appeals (BIA); but dis process neva dey easy.

Attorney general for Ghana Dr Dominic Ayine, file extradition request to US authorities for di ex-finance minister.

Dem wan make US authorities carry di minister and his chief of staff wen e be minister, to Ghana make dem face accountability for di time as minister for seven years from 2017 to 2024.

“At dis point, na di US authorities especially di judicial authorities wey go determine whether sufficient evidence dey wey go demand say make di two accused pipo, dey extradited to Ghana to stand trial,” id attorney general explain.

Di kontris special prosecutor’s office already slap di ex-minister and odas wit 78 counts of corruption and related offenses.

According to di special prosecutor Kissi Agyebeng, di ex-minister and oda accused pipo allegedly conspire to set up “criminal enterprise wey directly and indirectly influence di kontri procurement process to win contracts for di company (SML).”

“Di SML company carry unfair advantage to get transaction audit services, external price verification services, measurement audit for downstream petroleum products and odas form di Ghana govment through di finance ministry and di Ghana revenue authority.”

Kissi Agyebeng di special prosecutor tok say “dem begin di criminal enterprise for 2017 by di ex-finance minister Ken Ofori-Atta, Emmanuel Kofi Nti (ex-GRA commissioner) and Evans Adusei togeda wit di SML company itself.”

Di prosecutor say dem neva ensure value for money for di contracts dem carry give di SML company wey dem cause financial loss of Ghc 1.4bn ($128m).

Dis be some of di reasons why di kontri dey pursue di ex-minister; oda investigative agencies also dey find di minister to help dem investigate oda cases wey im allegedly dey involved.

Ken Ofori-Atta comot Ghana after his govment lose di 2024 elections wey he say he dey go for medical check-up and surgery – since dat time, he neva return.

Many pipo and political watches say di ex-minister dey run away from accountability and trial – but his lawyers say di minister gat nothing to hide.

Di govment thru di Attorney general and odas say dem go work to ensure say US authorities extradite di ex-minister to Ghana to face di law.

But dem also say dem go welcome any move wey go make di minister return to Ghana faster than di extradition – if ICE fit deport am, dem go happy say he go at least return to Ghana and face accountability like anybody else.

Pipo wey dey close to di ex-minister say tins no go be easy sake of di Ken Ofori-Atta apart from di US visa, also get Canada and UK visa, wia he fit go, but time no tell.

For now di ex-minster dey remain for custody for di Caroline Detention centre for Virginia, until sometin happun.

At di time di immigration hearing dey happun, one pressure group for Ghana and oda Ghanaians gada for di US embassy for Accra to protest.

Dem carry placards wey dem wear red shirts and armbands wey dem demand say make di embassy authorities work to bring di ex-finance minister back to di kontri to face trial.