Recovery operations still dey go on for Washington DC. Dis na afta one American Airlines plane from Kansas wey get 64 pipo onboard collide wit one military helicopter on Wednesday night.

Di victims include top figure skaters from US and Russia, one young pilot, flight attendants, and one lawyer wey dey travel go house on her birthday.

Here na some of di pipo believed to dey on board di helicopter and di plane.

26-year-old Indiana woman, Asra Hussain Raza, just move go Washington DC area afta she receive her master’s degree in hospital management.

“She bin dey return from one work trip wia she dey help improve one hospital wey really need help,” her husband Hamaad Raza, wey show di last text message e receive from im wife to news crews outside di airport, tok.

“And, you know, she bin dey do wetin she love. She bin even dey work on di flight.”

E add say: “She give a lot, but she get so much more to give. If anybody dey wey take advantage of dia 26 years of life, na her.”

Di president of Howard University don confam say Professor Kiah Duggins die for di collision.

Di civil rights lawyer dey set to begin lecture for di university School of Law for autumn.

“She dedicate her career to fighting against unconstitutional policing and unjust money bail practices for Tennessee, Texas and Washington DC,” di university tok for one statement wey US media report.

Two DC lawyers also dey on board di flight, dia loved ones confam.

Sarah Lee Best, 33, dey kind and hardworking, her husband Daniel Solomon tell di Washington Post.

Mrs Best and Mr Solomon bin plan to travel go Hawaii, wia dem born her for dia 10th wedding anniversary for May.

33-year-old Lawyer Elizabeth Keys, “always, always manage to have fun… no mata wetin she dey do,” her partner David Seidman tell di paper.

She die on her birthday, Oga Seidman tok.

Di firm wia two of dem dey work, Wilkinson Stekloff, pay tribute to di “cherished members” of dia team.

Dem be “wonderful attorneys, colleagues, and friends,” firm founder Beth Wilkinson tok for statement.

Dem don pay to “dedicated papa” Casey Crafton of Salem, Connecticut.

“Salem just lost a dedicated father, husband, and community member,” Govnor Ned Lamont bin write on social media.

Salem Little League, wia Oga Crafton be coach, tok say di town dey “heartbroken” by di loss of di “beloved” club member.

“Di Crafton family, dey deeply involved in all things Salem, di community don suffer an unimaginable loss,” di statement read.

Michael Stovall mama tok say her son na “di happiest pesin” wey dey see good in evri body.

Oga Stovall, wey pipo sabi well-well as Mikey, bin dey travel go house from one annual hunting trip wit friends, Christina Stovall tell Wink News.

“Mikey no get one enemy. If you see fotos of am… e be di life of di party. E love evri body.”

Oga Stovall cousin tell di New York Times say e bin dey fly wit at least six of im friends from di trip, some of dem don sabi each oda since childhood.

Jesse Pitcher bin dey travel wit Oga Stovall, im papa confam.

Di 30-year-old from Maryland just marry last year and e recently just start im own business, Jameson Pitcher tell di New York Times.

“E just dey start life,” e tok.

“E say im go see me wen e come back.”

Philippine National Police confam say di director of dia Supply Management Division, Colonel Pergentino N. Malabed, bin dey on board di flight.

One police tok-tok pesin say dem recover one body wey carry Col Malabed passport from di Potomac.

E travel go US wit two oda officers to test personnel vests wey di police dey plan to buy, and e bin dey on im way to di Philippine embassy for Washington.

Di plane captain Jonathan J. Campos dream since wen e be 3-year-old na to be pilot, im aunt tell di New York Times.

“I think e wan dey free, and dey able to fly and soar like a bird,” Beverly Lane tok.

34-year-old Oga Campos, 34, bin grow up for Brooklyn, New York, and e work for PSA Airlines (part of di American Airlines group) for eight years, she add.

Di papa of 28-year-old pilot Sam Lilley tok say e don dey engaged to be married and e “just dey for di prime of im life”.

Tim Lilley tell NewsNation say im son get im piloting license in only a few years becos e “pursue am wit vigour”.

“Sam dey right wit Jesus, and I know where e dey go,” e tok.

Im sister Tiffany Gibson dey call am “an amazing person”.

“E love pipo. E love adventure. E love to travel,” she tell ABC News.

“E dey so young, and e dey excited about life and im future and getting a dog and a house and kids. And it’s just, dis just dey tragic.”

Virginia resident Ian Epstein na flight attendant on di plane, im family tok.

E dey known for im ability to make pipo smile and e dey “full of life”.

“He love being a flight attendant becos e truly enjoy to dey travel and meet new pipo. But im true love na im family,” di statement continue.

Epstein, 53, na father, stepfather, husband, and brother, di family tok, and as say dem go “truly miss am”.

Danasia Elder also dey work as a flight attendant, her family tell US media for Charlotte, North Carolina.

Her brother-in-law Brandon Payne wey pay tribute to her, tok say she dey “full of life”.

“She be great wife, great parent, great friend,” Payne tok. “She dey very bright, very smart… Dis flight attendant thing na kind of like one of her dreams, something wey she wan do.”

E say im dey proud of im sister-in-law for pursuing her dreams, and she “go want make all of una do di same thing she do”.

“Chase your dreams, no mata what. No let anytin fear you, push you away. Just believe in yourself, believe in God, and follow di path.”

29-year-old Ryan O’Hara, na di crew chief of di Black Hawk helicopter wey jam di passenger plane, according to CBS News.

E leave behind a wife and one-year-old son, im local Reserve Officers’ Training Corps (ROTC) program tok for one social media post wey confam im death.

O’Hara dey “fondly remembered as dat guy wey go fix things around di ROTC gym, e also be ogbonge member of di rifle team,” di post tok.

Mississippi Governor Tate Reeves confam say Chief Warrant Officer 2 Andrew Eaves also die for di collision.

Paying tribute to her husband, Carrie Eaves confam say e be one of di pilots of di Blackhawk helicopter.

“We ask say make you pray for our family and friends and for all di oda families wey dey suffer today. We ask for peace while we grieve,” she write on social media.

Spencer Lane and Christine Lane

16-year-old Ice skater Spencer Lane, die alongside her mother Christine Lane, 49. Dem dey among di at least 14 athletes and coaches wey die as dem dey return from one skate camp for Wichita.

Im father tell local media say im son na “a force of nature” wey show “drive and tenacity” to di sport.

“E train for di Skating Club of Boston five days a week and attend high school online and just commit himself to it,” Douglas Lane tokj.

E add say im wife na “creative powerhouse” wey go do anything for her children.

Jinna Han, 13, bin also travel go di skate camp wit her mother, Jin.

For one 2022 interview, Jinna bin tell one news network for her Massachusetts hometown say she dey excited to watch di Olympics.

“E dey just so exciting,” Jinna Han tok. “E dey like, who go win, wetin go happun, becos anything fit happun for di Olympics.”

Doug Zeghibe of di Skating Club of Boston call Jin “wonderful, pleasant, polite” pesin.

“Never a discouraging word,” e tok. “Always appreciative, always supportive of not just Jinna, her daughter, but every athlete. Just role model parents in your sport, and you no dey always get dat.”

Evgenia Shishkova and Vadim Naumov

Di Kremlin confam di deaths of beloved ice skating coaches Evgenia Shishkova and Vadim Naumov, wey be Russian.

Famous skating coach and friend Rafael Arutyunyan tell CNN say e bin make im athletes train in silence afta di crash as mark of respect.

“I know all these coaches,” e tok. “All of our community dey respectful to dem and like dem, so I feel dem go stay wit us forever.”

Twelve-year-old Olivia Ter from Maryland dey among di US figure skaters aboard di flight, local officials confam.

“Olivia no only excelled in figure skating programs but inspire odas through her talent, determination and sportsmanship,” Prince George County Parks and Recreation tok for one statement wey CBS News report.

“Di impact of Olivia life go continue to resonate for our youth sports community, and we go miss her well-well,” Bill Tyler, di director of di Maryland-National Capital Park and Planning Commission, tok.

Cory Haynos, Roger Haynos and Stephanie Branton Haynos

Cory Haynos bin dey travel go house from di US Ice Skating Championships wit im parents, Roger Haynos and Stephanie Branton Haynos, one family member write on social media.

“Roger don always inspire me by im absolute love for im family and dedication to providing only di best for im wife and kids,” Matthew Alan LaRavier, Roger cousin, write.

“Cory na amazing skater wit a very bright future,” e tok.

“All of us bin dey expect Cory to represent our kontri for US Olympics for di future.”

Former coach Sasha Kirsanov bin dey on board di plane, di University of Delaware tok.

Im wife tell ABC News say she don “lost everything” for di crash.